Kraftur í stað kyrrstöðu eða Latibær?

Ég fór á áhugaverðan fund í vikunni þar sem var verið að kynna stofnun Akureyrarstofu. Fundurinn var vel sóttur og áhugaverður. Eins og ég skildi hlutverk Akureyrarstofu þá fannst mér það aðallega snúast um að láta menningar- og íþróttaviðburði nýtast sem aðdráttarafl fyrir ferðaiðnaðinn á Akureyri. Ég held að þetta sé góð hugmynd og vona að framkvæmd þessara mála eigi eftir að takast vel því að maður fær bara einn punkt fyrir góða hugmynd meðan maður fær 10 punkta fyrir góða framkvæmd á réttri hugmynd eins og allir vita.

Ég hafði það á tilfinningunni að einhverjir héldu að Akureyrarstofa væri einhverskonar skrifstofa með starfsmönnum sem þar ynnu. Minn skilningur er hins vegar sá að þetta sé nefnd á vegum bæjarins þ.e að það sé búið að sameina nokkrar nefndir undir einn hatt og að það hafi þótt betra að kalla nefndina Akureyrarstofu frekar en Menningar- Kynningar og Markaðsnefnd Akureyrarbæjar.

Hólmkell Amtsbókavörður var með frábært erindi þar sem hann sagði fá Slow City hreyfingunni og var í reynd að leggja til að við kynntum Akureyri fyrir ferðamönnum og markaðsettum bæinn sem rólegan bæ sem Akureyri jú er. Ég skildi hann sem svo að við þyrftum mögulega að slökkva á nokkrum auglýsingaskiltum og kannski setja upp fleiri ruslafötur til þess að uppfylla skilyrðin sem sett eru fyrir því að Akureyrarbær geti kynnt sig sem Slow City.

Svavar prestur hélt ágætis tölu og benti á að kirkjan væri sennilega mest sótta ferðamanna atractionið í bænum. Ég held reyndar að það sé Víkingurinn í göngugötunni sem hafi vinninginn. Sennilega eru þetta mest ljósmyndaða fyrirbærið á Akureyri af ferðamönnum. Það segir okkur Akureyringum kannski eitthvað að það sem valdi mestum spenningi hjá erlendum ferðamönnum sem sækja okkur heim skuli vera gömul snjáð lopapeysa í stærðinni XXXL, eða hvað. (Er þetta flúorljós sem er í krossinum ofan á kirkjunni gætum við hugsanlega þurft að taka hann niður?).

Baldvin vinstri grænn hafði greinilega talsverða trú á þessari hugmyndarfræði og sagði að ef við héldum rétt á spöðunum að þá yrði Akureyri orðinn mesti ferðamannabær landsins eftir 10-15 ár. Þá heyrði ég Friðrik V muldra fyrir aftan mig að bærinn væri búinn að vera það í 10 ár. Kannski gerum við Akureyringar okkur ekki alltaf grein fyrir því hvað við erum mikill ferðamannabær. Friðrik sem er mikill frumkvöðull hefur reyndar lengi verið félagi í Slow Food en Slow City er afsprengi þeirrar hreyfingar og gaman að sjá hvað hans hugmyndir um hvernig eigi að byggja upp ferðamannaiðnað eru smátt og smátt að ná eyrum annarra akureyringa.

Ég er þeirrar skoðunar að það geti verið sniðugt að ná til erlendra og innlendra ferðamanna með því að kynna Akureyri sem rólegan bæ, sem einskonar oasis frá stressinu í borgunum. Enda er Akureyri rólegur bær og þar af leiðandi engu logið. Hins vegar er einn galli á þessu en hann er sá að þetta concept er svolítið í andstöðu við þær hugmyndir sem við höfum verið að reyna að búa til um okkur og kannski ekki síst verið að reyna að móta sjálfsmynd okkar sjálfra bæjarbúa þannig að við séum dínamískur og kraftmikill bær og að hér séu líka hlutir að gerast. Hins vegar er alveg klárt að í dag erum við rólyndis bær og það eru fáir sem flytja í bæinn til þess að meika það heldur er fólk sem hingað flytur oftast að leita að einhverju öðru í lífinu.

Gísli Aðalsteinsson

Athugasemdir

[Hlynur Hallsson, 2.2.2007 kl. 13:33]

Sæll Gísli og takk fyrir ljómandi grein. Mér brá smá þegar ég las fyrirsögnina og hélt eitt augnabilk að þú hefðir eitthvað á móti tillögunni um að kynna Akureyri sem rólegheitabæ. En sem betur fer var það ekki raunin. Þetta er jú frábær hugmynd og góð markmið sem við getum stefnt að. Reykjavík er hinsvegar lang mest sótti ferðamannabærinn á landinu og auðvitað verður erfitt fyrir Akureyri að komast framfyrir enda er markmiðið ef til vill ekki fjöldi ferðamanna heldur að þetta séu góðir ferðamenn (sem skilja eitthvað eftir og nýti sér fjölbreytta þjónustu o.s.frv.) Semsagt gæði fram yfir magn. Eitt af því sem þarf að gera er að efla beint flug frá Evrópu til Akureyrar. Margir þeirra sem koma til landsins fara aldrei út fyrir suðvestur hornið: Reykjavík, Bláa lónið, Gullfoss og Geysir, dugar þeim. Norðurland hefur hinsvegar uppá svo margt að bjóða fyrir utan Akureyri og við getum orðið upphafið og endirinn á þeim heimsóknum. Bestu kveðjur,

[Gísli Aðalsteinsson , 2.2.2007 kl. 14:49]

Auðvitað er hægt að skoða þetta bæði út frá algildum eða hlutfallslegum stærðum þ.e. hvort Höfuðborgin eða Akureyri eru meiri ferðamannastaðir. En samkvæmt þinni skilgreiningu þá er Úkraína meira ferðamannaland heldur en Kípur vegna þess að það koma fleiri ferðamenn til Úkraínu. Ég man ekki eftir því að fjöldi þeirra sem dvelji í Reykjavík tvöfaldist yfir einstaka helgi eins og gerist stundum hér á Akureyri.

En þetta skiptir auðvitað engu máli það sem skiptir máli er að bærinn er mikill ferðamannabær og ferðaiðnaður skiptir okkur máli.

(Þegar kemur að mælingum á miklu eða litlu að þá hafa vinstri græn viljað halda sig við hlutfallslegar stærðir upp á síðkastið s.b. umræðu um fátækt á íslandi.)

Gísli Aðalsteinsson 

[Hlynur Hallsson, 2.2.2007 kl. 17:14]

Ok, en þá er Grímsey laaangmesti ferðamannastaðurinn :)

Ég held að við getum alveg keppt um þennan tiltil án þess að vera með eitthvað hlutfallslega-mælikvarða. Bestu kveðjur,

[Helgi Már Barðason (IP-tala skráð) 2.2.2007 kl. 18:02]

Sæll, Gísli, og þakka þér forvitnilegan og ágætan pistil. Var bara að velta fyrir mér hvernig fyrirbæri á borð við Halló Akureyri, eða Ein með öllu, eða hvað þetta nú heitir frá ári til árs, félli inn í svona Slow City-hugmyndir. Ég hef aldrei dregið dul á þá skoðun mína að ekki eigi að markaðssetja Akureyri sem fylliríis- og dópbæli, ekki einu sinni eina helgi á ári, þó að einhverjir kaupmenn telji svona "hátíð" e.t.v. lífsspursmál fyrir sig. Ég get í fljótu bragði ekki séð að verslunarmannahelgarsukkogsvínaríisorgía samræmist hugmyndum um rólegheitabæ og sé það rétt skilið hjá mér óska ég þessari hugmynd háflugs og velgengni. (PS: Efast um að Víkingurinn hafi vinninginn yfir kirkjuna, a.m.k. þegar innlendir ferðamenn eru meðtaldir).

[Gísli Aðalsteinsson , 5.2.2007 kl. 10:50]

Ég veit svo sem ekki að hvaða concepti Halló Akureyri hátíðin fellur. Getið þið sagt mér það? 

[Ingimar (IP-tala skráð) 5.2.2007 kl. 18:03]

Hún fellur að koseptinu "Græðum græðum" sama hvað það kostar !!

[Jón Þorvaldur (IP-tala skráð) 7.2.2007 kl. 13:19]

Leiðinlegur bær vs. skemmtilegur bær.  Ég hef miklar efasemdir um þetta slow city og Akureyri.  Mér sýnist þetta stefna í þá átt að gera Akureyri leiðinlegri bæ en hann er.  Trúið mér, það verður ekki auðveldara að draga túrista til bæjar sem er leiðinlegur en til bæjar sem er skemmtilegur.  Með skemmtilegum bæ á ég við bæ þar sem eitthvað er í gangi, veitingahús, kaffihús, barir, verslanir (meira að segja með auglýsingarskiltum), leikhús, bíó, tónleikar, listsýningar og annað sem eitthvað er gaman að.  Ekki bæ þar sem ekkert er annað að gera fyrir ferðamanninn en lúra einmana á koddanum á hótelinu fram yfir hádegi hálfdauður úr leiðindum.

Þegar ég fer til annara bæja eða borga er það í og með til að sleppa frá hvesdagsleikanum og slappa af.  Fór til dæmis til Varsár haustið 2005.  Þar röltum við um og skoðuðum verslnir, veitingastaði og horfðum á mannlífið.  Slappaði sem sagt af.  Samt held ég að Varsjá sé ekki slow city.  Það sem var mest afslappandi var að geta flogið beint frá og til Akureyrar.

Ég held að best sé að Akureyri sé áfram kraftmikill bær.  held að samt sem áður sé aflappandi fyrir borgarbúa að heimsækja hann.  Ef menn vilja algera þögn og sveitakyrrð er hún allt í kringum bæinn.  Það er enginn skortur á þeim gæðum ef farið er nokkra km frá Akureyri.   Held að við ættum að markaðssetja þessa samloku:  kyrrð og sveitaslæa + karftmikill bær þar sem eitthvað er að gerast, þú velur hvað þú villt.

Jón Þorvaldur 

[Gísli Aðalsteinsson , 8.2.2007 kl. 12:17]

Jón Þorvaldur ég held að þetta sé byggt á ákveðnum misskilningi á því hvað Slow City er. Það er einmitt markmiðið að gera bæinn skemmtilegri að sækja heim. Skoðaðu þennan vef http://www.cittaslow.net/

 Gísli

[Gísli Aðalsteinsson , 8.2.2007 kl. 12:23]

Ingimar ég held að það sé ágætt að við reynum að græða á þeim gestum sem koma til bæjarins út á það gengur ferðaiðnaðurinn. Ég er hins vegar ekki sannfærður um að Halló Akureyri (í því formi sem sú hátíð hefur verið) sé besta leiðin til þess þegar horft er til lengri tími.